Аналитика
Автомобилската индустрија трпи сериозни удари како резултат на пореметеното снабдување со микрочипови и на војната во Украина. Покрај намалувањето на испораките на чиповите, високите цени на суровините би можеле да ги попречат плановите за закрепнување – руската инвазија на Украина заедно со високите трошоци за енергија може да ги задржи цените надуени.
Производителите на чипови преземаат чекори за забрана на извозот на чипови во Русија. Дали ова ќе ослободи некои залихи за другите пазари? Влијанието може да биде мало бидејќи Русија добива околу 70% од своите чипови од Кина.
Сепак, списокот на светски производители на возила кои престануваат со работа поради руско-украинската криза расте. Тојота го запре производството на возила на неодредено време во својата фабрика во Санкт Петербург во Русија од 4 март, придружувајќи им се на колегите како Мерцедес-Бенц, Форд и БМВ.
Но и покрај пост-омикрон импулсот на државите повторно да ги отворат границите за да ги стимулираат економиите, инвазијата на Русија врз Украина на глобално ниво резултираше со тоа производителите на најпознатите брендови на возила да ги затворат руските погони и да го запрат извозот во Русија.
Европските производители на возила ќе бидат погодени бидејќи линиите за снабдување од двете земји пресушуваат. Јужнокорејските Hyundai Motor и Kia Motors ќе бидат повредени бидејќи имаат производствени погони во Русија. Hyundai учествуваше со 10,3%, додека Kia имаше 12,3% од рускиот пазар на возила во 2021 година.
Амбициите за електрични возила, исто така, би можеле да бидат исфрлени од шините. Украина е главен производител на никел и алуминиум – материјали потребни за батерии и компоненти за електрични возила.
Во меѓувреме, Русија не се очекува да влијае многу на глобалниот сектор на чипови бидејќи зафаќа само 0,1% од пазарот, според Здружението на индустријата за полупроводници. „Индустријата за полупроводници има разновиден сет на добавувачи на клучни материјали и гасови, така што не веруваме дека има непосредни ризици за прекин на снабдувањето поврзани со Русија и Украина“, соопшти здружението на 24 февруари.
Меѓутоа, индустријата зависи од ретки гасови од Украина, како што е неонот, гас составен дел на ласерите што се користат во процесите на производство на чипови.
Porsche целосно го запре производството
Реномираниот производител на луксузни автомобили најави дека ќе биде прекинато производтвото на моделите 911 GT3 и GT3 Touring, почнувајќи од 17 март. После тоа, целото друго производство на 911 ќе биде стопирано на 31 март. Производството на 718 Cayman and Boxster ќе биде прекинато на 14-ти. Овие автомобили ќе им се придружат на Cayenne, Macan, Taycan и Panamera, четири автомобили на кои веќе им е прекинато производството.
Во моментов нема информации за тоа колку долго ќе трае паузата за новопогодените модели. Сепак, Porsche објави дека производството на Panamera и Macan се планира да се рестартира на 11 март.
Ферари и Ламборџини го стопираа извозот за Русија
Производителот на луксузни автомобили Ферари во вторникот соопшти дека ќе го прекине извозот во Русија поради инвазијата на Москва на Украина. „Со оглед на тековната ситуација Ферари донесе одлука да го прекине производството на возила за рускиот пазар до натамошно известување“, се вели во соопштението на италијанската компанија.
Ферари се надоврзува на голем број компании, вклучително и производители на автомобили, други производители и групи за луксузна стока, кои презедоа активности за ограничување, застој или напуштање на деловните активности во Русија по инвазијата на Москва на Украина. И ривалскиот производител на спортски автомобили Ламборџини, единица на Фолксваген во вторникот соопшти дека го прекинала својот бизнис со Русија.
Минатата недела Ферари рече дека Русија е многу мал пазар за неа и дека во моментот не гледа никакво влијание врз синџирот на снабдување како последица на руската инвазија на Украина.
Компанијата Форд Мотор го прекина целото производство во Русија. Форд продаде приближно 22.000 возила во Русија минатата година, што претставува 0,5 отсто од вкупните испораки ширум светот. Приближно 20.000 од тие возила се изградени локално како дел од неодамна раскинатиот договор Форд-Солерс.
Затворени фабриките на Рено, Тојота, Фолксваген во Русија
Рено суспендираше некои операции во своите три фабрики во Русија, наведувајќи ги „прекините во снабдувањето со компоненти“ – сепак ќе продолжи да ги продава своите автомобили во оваа земја. Цената на акциите на францускиот производител падна за речиси една четвртина веднаш по инвазијата поради неговото потпирање на руските делови и сопственоста на марката Лада (АвтоВАЗ).
Рено и неговите подружници продадоа приближно 500.000 автомобили во Русија во текот на 2021 година, што претставува 18 отсто од вкупните испораки низ целиот свет. Иако точните бројки не се објавени, значителен процент од тие возила се произведениво Русија.
Тојота ги затвори вратите на својата фабрика во Санкт Петербург и привремено го запре целиот увоз – како причина за прекин на синџирот на снабдување.„Ги следиме тековните случувања во Украина со голема загриженост за безбедноста на луѓето во Украина и се надеваме на безбедно враќање на мирот што е можно поскоро… Тојота ќе го запре производството во својата фабрика во Санкт Петербург и го запре увозот на возила“, се вели во официјалното соопштение на јапонскиот производител.
Тојота продаде приближно 97.000 автомобили во Русија во текот на 2021 година, што претставува 1,1 отсто од нејзините вкупни испораки ширум светот. Таа изгради приближно 80.000 од тие возила дома.
Фолксваген го прекина целиот увоз на возила во Русија и ги затвори вратите на своите фабрики во Калуга и Нижни Новгород – исто така наведувајќи хуманитарна загриженост поради војната во Украина.
Фолксваген и неговите подружници продадоа приближно 200.000 автомобили во Русија во текот на 2021 година, што претставува 2,3 отсто од вкупните испораки низ целиот свет. Изгради приближно 170.000 од тие дома.
И Мерцедес-Бенц го прекина целиот извоз во Русија и ги прекина своите локални производствени операции, повикувајќи се на загриженост од војната. Mercedes-Benz продаде приближно 44.849 автомобили во Русија во текот на 2021 година, што претставува 2,2 отсто од вкупните испораки ширум светот. Изгради приближно 20.000 од тие дома.
Катанци на фабриките на руска Лада
Фабриката за домашниот автомобил Лада, наводно, пушти илјадници работници на одмор, прекин што некогаш се сметаше за „незамислив“, пишува Журнал. Портпаролот на матичната компанија на Лада, АвтоВАЗ, рече дека компанијата планирала да го запре производството до 11 март поради глобалниот недостиг на чипови; тој не ги коментираше санкциите.
Над 20 отсто од деловите на АвтоВАЗ се донесени надвор од Русија, велат извори запознаени со ова прашање. „Ако трговијата престане, АвтоВАЗ престанува“, вели поранешен член на управниот одбор на компанијата. Поранешниот член додаде дека може да бидат потребни месеци или можеби години за да се рестартира производството без францускиот производител на автомобили Renault SA, кој сега е сопственик на AvtoVAZ.
Имајќи го тоа предвид, Русија ќе се соочи со „недостиг на нови возила доколку производителите на автомобили како AvtoVAX останат парализирани“. Lada е единствениот домашен бренд во земјата со „значителен удел на пазарот“, а исто така е „дел од националната психа на Русија“, слично на General Motors за САД, пишува Журнал.
