КАКО ДА ОСНОВАТЕ СОПСТВЕНА ФИРМА ВО МАКЕДОНИЈА?

Имајќи ја предвид динамичноста на модерното општество и потребата од брза регистрација на трговските дејности  со законите во Македонија се овозможи брзо основање на трговските друштва преку електронска регистрација во Централниот Регистар.

Како најпогодна форма за извршување на трговските дејности, инвеститорите најчесто ја одбираат формата на друштво со ограничена одговорност и тоа доколку е основано од лице, во форма на ДООЕЛ, а доколку пак за основањето се јавуваат повеќе од едно лице, во форма на ДОО.

Оваа форма всушност значи дека основачот/ите се ограничено одговорни за обврските на друштвото кон трети лица и тоа само во висина на преземениот влог во друштвото.

Имено, влогот во друштвото може да биде паричен и/или непаричен, а основната главнина на друштвото (збирот од сите влогови) мора да биде најмалку со вредност од 5.000 ЕУР во денарска противвредност според среден курс на НБРСМ на денот на уплатата и истата не е задолжително да биде внесена при основањето, туку во период од 1 (една) година од денот на основањето на Друштвото. Минималниот влог на еден основач, може да изнесува 100 ЕУР во денарска противвредност според среден курс на НБРСМ на денот на уплатата.

Друштво со ограничена одговорност може да биде основано од едно или од повеќе физички и правни лица (од други друштва), но најмногу од 50 содружници. Друштвото со ограничена одговорност се основа со договор за друштвото што го склучуваат сите основачи во писмена форма или во електронска форма (доколку друштвото го основа едно лице договорот за друштвото се заменува со изјава на основачот за основање на друштвото со ограничена одговорност), во писмена форма или во електронска форма потпишана со електронски потпис согласно со Системот за е-регистрација.

Договорот за друштвото, односно изјавата за основање на друштвото во писмена форма, се заверува со потписи на содружниците со електронски потпис на регистрацискиот агент, или во електронска форма се потпишува со електронски потпис на содружниците на друштвото преку Системот за е-регистрација. Основачите го склучуваат договорот за друштвото лично или преку полномошник, кој мора да има полномошно заверено кај нотар, освен во случај кога полномошното е потпишано со електронски потпис согласно со Системот за е-регистрација. Полномошно не е потребно ако застапникот на основачот врз основа на закон е овластен за него да го склучи договорот за друштвото, односно да даде изјава за основање на друштвото.

Основањето на друштвото се запишува во трговскиот регистар (Централен Регистар на РМ), а пријавата за упис на основањето на друштвото ја поднесува управителот, преку Регистрациониот Агент. Постапката за регистрацијата на основањето на Друштвото во Трговскиот регистар е со времетраење од 1-5 работни дена.

Кон пријавата за упис на основањето на друштвото се приложуваат:

1. Акт за основање;
2. Документ за лична идентификација;
3. Проценка за внес на непаричен влог, или доказ за уплатен паричен влог (доколку друштвото се основа со внесување на основна главнина при уписот);
4. Одлука за избор на управител/и и изјава за прифаќање на функцијата управител;
5. Одлука за избор на надзорен орган, односно контролор/и; дозвола или акт на државен орган доколку истата е потребна за упис на дејноста на трговското друштво;
6. Изјава од основачите дека не постои законски пропишана пречка да основаат друштво;
7. Изјава до овластено лице- управител дека друштвото е основано согласно закон и дека сите приложени исправи се вистинити, Заверен потпис на овластеното лице- ЗП образец.

По уписот на основање на Друштвото, не заборавајте во рок од 8 дена да ги регистрирате и вистинските сопственици на Друштвото во Регистарот за вистински сопственици.

Доколку Ви се потребни дополнителни информации и консултации во врска со објавеното, слободно контактирајте нѐ на [email protected]

Пишува: Правен тим на Пари