Аналитика
До 2030 година Европската унија би можела да стане зависна од Кина за литиум-јонските батерии и горивните келии, исто толку колку што беше енергетски зависна од Русија пред војната во Украина. Во случај ако не преземе силни мерки, се вели во документот подготвен за лидерите на ЕУ, до кој дошол „Ројтерс“.
На овој документот ќе се засноваат дискусиите на лидерите од ЕУ, кои ќе се состанат на петти октомври во Гранада, Шпанија, каде што ќе се третира економската безбедност на Европа.
Загриженоста произлегува од растот на самоувереноста на Кина заснована на јакнењето на глобалните позиции и на економската тежина што ја има таа држава. Затоа лидерите ќе разговараат за предлозите на Европската комисија кои се во насока на намалување на ризикот Европа да стане премногу зависна од Кина. Како и за потребата да се ориентира кон Африка и Латинска Америка.
Во документот е наведено дека поради променливата природа на обновливите извори на енергија – сончевата или ветерната, на Европа ќе и требаат можности за складирање на енергија за да ја постигне својата цел за нула емисија на јаглерод диоксид до 2050 година.
„Ова до небо ќе ја зголеми нашата побарувачка за литиум-јонски батерии, горивни келии и електролизери, што се очекува да се мултиплицира од 10 до 30 пати во наредните години“, се вели во документот подготвен од шпанското претседателство.
И покрај тоа што ЕУ има силна позиција во средната и монтажната фаза на производство на електролизери, со повеќе од 50 проценти удел на глобалниот пазар, таа во голема мера се потпира на Кина за горивни келии и литиум-јонски батерии клучни за електричните возила.
„Без спроведување силни мерки, европскиот енергетски екосистем би можел да стане зависен од Кина до 2030 година, од различна природа, но со слична сериозност од онаа што ја имаше од Русија пред инвазијата на Украина“, се вели во извештајот.
Според ЕК, во 2021 – годината пред руската инвазија на Украина, ЕУ од Русија обезбедила повеќе од 40 отсто од вкупната потрошувачка на гас, 27 отсто од увозот на нафта и 46 отсто од увозот на јаглен.
Прекинувањето на повеќето набавки на енергија од Русија предизвика ценовен шок во ЕУ и пораст на инфлацијата, принудувајќи ја Европската централна банка нагло да ги зголеми каматните стапки, потег што го спречи економскиот раст.
Литиум-јонските батерии и горивните келии не се единствената област на ранливост на ЕУ, се вели во документот.
„Слично сценарио може да се развие во дигитално-технолошкиот простор. Прогнозите сугерираат дека побарувачката на дигитални уреди како што се сензори, дронови, сервери за податоци, опрема за складирање и мрежи за пренос на податоци нагло ќе се зголеми во текот на оваа деценија“, стои во документот.
До 2030 година оваа зависност може сериозно да ги попречи придобивките од продуктивноста што итно ги бараат европската индустрија и услужниот сектор и може да ја попречи модернизацијата на земјоделските системи, кои се суштински за справување со климатските промени, се вели во извештајот.
