Драстичен пад на домашното производство на струја на само 58,5% во ноември, кога цените на берза дивееја

Домашното производство на струја во ноември учествува со само 58.5% во домашната потрошувачка на електрична енергија што е запрепастувачки во услови кога цената на оваа енергија изминатиот период на светските берзи рушеше рекорди. Само за појаснување цената на електричната енергија произведена во домашните капацитети граѓаните ја плаќаат за 41 евро за мегават/час додека онаа од увоз достигнуваше и до 200 евра за мегават.

Државниот завод за статистика во информацијата што ја објави денес информира дека во ноември 2021 година, вкупната потрошувачка по видови енергенти изнесува: 699 451 МWh електрична енергија, 47.974 мил. нм3 природен гас, 319 373 тони јаглен и 102 983 тони нафтени продукти.

Бруто-домашното производство на електрична енергија учествува со 58.5 % во бруто-домашната потрошувачка на електрична енергија, додека 94.4 % од вкупната потрошувачка на јаглен се употребени за производство на електрична енергија.

Поинаква била соостојбата во октомври месец. Според податоците на Државниот завод за статистика, во октомври 2021 година, вкупната потрошувачка по видови енергенти изнесува: 595 653 МWh електрична енергија, 45 762 мил. нм³ природен гас, 336 109 тони јаглен и 98 364 тони нафтени продукти.

Иако и потрошувачката на струја била помала, бруто-домашното производство на електрична енергија во октомври учествува со 71.9 % во бруто-домашната потрошувачка на електрична енергија, додека 97.1 % од вкупната потрошувачка на јаглен се употребени за производство на електрична енергија. Ваква од прилика е вообичаената месечна слика за работата на домашните енергетски капацитети.

Сепак, зошто во ноември дошло до ваков пад на домашното производство на струја? Дел од причините беа дефекти на блоковите на РЕК Битола кој е најзаслужен за производството на струја во земјава. Втора причина е немањето на јаглен. Во меѓувреме и водостојот беше намален, па и хидроцентралите не работеа со полн капацитет.

Додека енергетската криза тлееше во земјава, на светските берзи дивееја цените на електричната енергија, во некој период од денот искачувајќи се и до 1000 евра за мегават час. Цехот од неработењето на домашните капацитети и високата цена на струјата на берзите допрва ќе го почувствуваат граѓаните по својот џеб.

Редакција Пари