Драстичен пад на кинеските заеми

По речиси една деценија амбициозен раст, Кина драстично ја ограничи програмата за заеми во странство, покажуваат новите истражувања.

Износот на заемите одобрени од Кинеската банка за развој, и Банката за извоз на Кина, падна од врвот од 75 милијарди долари, во 2016 година, на само 4 милијарди долари минатата година, покажуваат податоците собрани од истражувачите на Универзитетот во Бостон, објави британскиот весник „Фајненшл тајмс“.

Остриот пад се случува кога Кина ја преиспитува Иницијативата за појас и пат. Тоа е проект кој финансира и гради патишта, железници, пристаништа и други инфраструктурни проекти во повеќето земји во развој.

Иницијативата се повеќе се критикува низ целиот свет за низа слабости, вклучувајќи заеми за земји со разнишани финансии и недостаток на транспарентност или студии за социјалното и влијанието врз животната средина на финансираните проекти, потсетува ФТ.

Кевин Галагер од Центарот за глобален развој на Универзитетот во Бостон, кој ги собра податоците, рече дека трговската војна со САД е еден од факторите на драматични промени.

Според неодамнешниот извештај на Институтот за развој во странство, Кина сега сфаќа дека нејзиниот пристап кон заеми е неодржлив, пишува ФТ.

„Стариот модел, според кој интересите на кинеските компании и локалните елити имаат предност, носи непропорционален износ на ризик од неуспех на проектот, и може да стане уште понеодржлив поради намалената способност на државите да преземаат долгови и ризици“