Аналитика
Цените на нафтата денес скокнаа за повеќе од 3 долари, со брент над 111 долари за барел, додека земјите од Европската унија размислуваат да им се придружат на САД во руското нафтено ембарго, додека нападот на саудиските нафтени постројки викендов предизвика нервоза.
Фјучерсите на суровата нафта „брент“ се искачија за 3,74 долари, или 3,5 отсто, на 111,67 долари за барел во утринското наддавање, додавајќи на порастот на цените од минатиот петок за 1,2 отсто. Фјучерсите на американската сирова нафта западен Тексас (WTI) пораснаа за 3,98 долари, или 3,8 отсто, на 108,68 долари, зголемувајќи го скокот од 1,7 отсто минатиот петок. Цените се зголемија пред разговорите оваа недела меѓу владите на Европската унија и американскиот претседател Џо Бајден за серијатасостаноци кои имаат за цел да го заострат одговорот на Западот кон Москва поради нејзината инвазија на Украина. Во меѓувреме, владите на земјите на ЕУ размислуваат дали да воведат ембарго за нафта на Русија.
Денес, заменик-премиерката на Украина, Ирина Вершчук, рече дека нема шанси силите на земјата да се предадат во опколениот источен пристанишен град Мариупол. Со мали знаци за олеснување на конфликтот, фокусот се врати на тоа дали пазарот ќе може да ги замени руските барели погодени од санкциите.
Јеменските бунтовници и саудиската нафта
„Нападот на Хутите врз енергетскиот терминал во Саудиска Арабија, предупредувањата за структурен недостиг во производството од ОПЕК и потенцијалното нафтено ембарго на Европската унија кон Русија предизвикаа скок на цените на нафтата во Азија“, изјави високиот аналитичар на ОАНДА, Џефри Хали. „Дури и ако војната во Украина заврши утре, светот ќе се соочи со структурен енергетски дефицит, благодарение на руските санкции.
Во текот на викендот, нападите на јеменската група Хути, поврзана со Иран, предизвикаа привремен пад на производството во заедничкото вложување на саудиската рафинерија Арамко во Јанбу, поттикнувајќи ја загриженоста на вознемирениот пазар на нафтени производи, каде Русија е клучен снабдувач, а глобалните залихи се на повеќегодишно најниско ниво.
Последниот извештај на Организацијата на земјите извознички на нафта и сојузниците, вклучително и Русија, заедно наречени ОПЕК +, покажа дека некои производители сè уште не ги исполнуваат договорените квоти за снабдување. ОПЕК + ја пропушти целта за производство за повеќе од 1 милион барели дневно во февруари, изјавија три извори за Ројтерс, во рамките на нивниот договор за зголемување на производството за 400.000 барели дневно секој месец, бидејќи ги враќаат острите намалувања направени во 2020 година.
Двете земји на ОПЕК со капацитет веднаш да го зголемат производството, Саудиска Арабија и Обединетите Арапски Емирати, досега се спротивставуваа на повиците од големите земји-потрошувачи да го забрзаат производството за да помогнат во намалувањето на цената на нафтата. Американските енергетски фирми, исто така, се борат да го задржат бројот на активни нафтени платформи, и покрај високите цени.
Лошата перспектива за снабдување и високите цени ја поттикнаа Меѓународната агенција за енергетика во петокот да ги претстави начините за намалување на употребата на нафта за 2,7 милиони барели дневно во рок од четири месеци, препорачувајќи има на граѓаните да користат заедничко користење на автомобили, па на властите пониски ограничувања на брзината и поевтин јавен превоз. Тоа ќе помогне да се неутрализираат 3 милиони барели на ден руска сурова нафта и производи за кои ИЕА процени дека ќе бидат надвор од пазарот од април.
