Аналитика
Владата е против одземањето на ингеренциите на Град Скопје поради блокадите на сообраќајот предизвикани од кавгата на скопската градоначалничка Данела Арсовска со приватните автопревозници. „Ние се бориме последните 20 години за децентрализација. Тоа е во суштина одлика на големите развојни држави. Одземањето ингеренции е враќање назад за 20 години. Ние повикуваме на разум, повикуваме дека никој нема штета од разговори“, изјави вицепремиерот за европски прашања Фатмир Битиќи по денешниот настап на конференцијата за локална самоуправа, каде домаќин му беше министерот за локална самоуправа Ристо Пенов.
Битиќи во одговор на новинарско прашање рече дека Владата е секогаш тука за граѓаните но, како што посочи, одземањето на ингеренциите на Градот значи влегување во суштински и системски промени и би било на штета, не само на граѓаните на Скопје, туку и на целокупното функционирање на системот.
„Јавниот превоз во Градот Скопје е во ингеренции на Градот Скопје и по закон. Сметам дека Град Скопје треба да се одважи и конечно да седне да го решат проблемот. Ако не е возможно, ние докажавме дека секогаш сме тука за граѓаните. Го решивме проблемот со топлинската енергија, го решаваме проблемот со електричната енергија во целата држава и можеби ќе влеземе веќе во преговори, но тогаш ќе значи нешто друго – дали е тоа и одземање на ингеренции за Градот Скопје, влегување во суштински и системски промени, не знам, затоа што вакво однесување на надлежните сметам дека се на штета не само на граѓаните на град Скопје, туку и на целокупното функционирање на системот“, изјави Битиќи во врска со проблемот со сообраќајниот колапс во главниот град, во кој и денес продолжи блокадата на улиците од страна на приватните автобуски превозници.
Овие мерки се надополнување на мерките за засилено финансирање на приоритетни проекти на помалите и претежно рурални општини преку програмите за рамномерен регионален и рурален развој. Со тоа на општините ќе имаат пристап до повеќе финансиски средства за спроведување на повеќе проекти на општинско, локално и регионално на ниво на региони за да ја подобруваме целосната инфраструктура во секое населено место.Дополнително, само преку пет поголеми проекти, меѓу кои и „Проектот за поврзување на локалните патишта“, инвестирани се над 250 милиони евра во општините. Со ТАВ програмата се реализираат 94 инфраструктурни проекти кои се директно насочени кон потребите на граѓаните со вкупна вредност од 49,7 милиони евра, потсети вицепремиерот. Овие проекти се реализираат со одлична динамика. За само една година имаме реализација на 80% на започнатите проекти, а останатите ќе бидат реализирани во предвидениот рок до крај на 2023 година.Со проектот „ЕУ за општините” во надлежност на Министерството за локална самоуправа, во наредните три години во општините Велес, Радовиш, Тетово, Аеродром, Врапчиште, Охрид, Струмица и Градот Скопје ќе се реализираат големи иновативни проекти во вкупна вредност од 5,5 милиони евра.Би сакал да нагласам и дека е задржан трендот на зголемување на вкупните приходи на општините. Од 30.1 милијарда денари во 2015 година, вкупните приходи на општините се зголемени на близу 40 милијарди денари во 2021 година, рече Битиќи. Сопствените приходи се зголемени од 12.3 милијарди денари во 2015 година на близу 17 милијарди денари во 2021 година.Покрај зголемувањето на фискалните трансфери кон општините, Владата е посветена и на изнаоѓање на дополнителни средства за капитални инвестиции. Како неодамнешното потпишување на договорот со Европската инвестициска банка, за заем од 50 милиони евра наменети за водоводна инфраструктура и третман на отпадни води во општините. На овој начин ќе се обезбеди инфраструктура која е значајна за подобрување на животот на граѓаните на сите општини во државата.Вицепремиерот апелираше да се насочи особено внимание кон реализација на покрупни капитални инвестиции врз основа на одобрени заеми и склучени договори со меѓународни финансиски институции. „Тука би сакал да се осврнам пред сѐ на потребата да се искористат средствата во висина од 70 милиони евра за новиот градски превоз во Град Скопје, за две автобуски линии од Ѓорче Петров до Ново Лисиче и од Кисела Вода до Бутел, проект кој зависи од одлуките на градските власти, како и мега проектот за изградба на пречистителната станица во Градот Скопје, за кој низ комплексни преговори е направена финансиска конструкција со учество на низа меѓународни партнери. Во прв ред тоа е Европската Унија и нејзините финансиски институции“, рече Битиќи.
