Аналитика
Македонската економија, од аспект на технолошката подготвеност за излез на единствениот европски пазар, се оценува со тројка на скалата од еден до десет. Потребна е работа, прилагодување и усвојување на стандардите, а сето тоа треба да се постигне до пристапувањето на државата кон Европската унија. Тоа особено се однесува за микро, малите и средните претпријатија, беше нагласено во Стопанската комора, каде што се одржа прес конференција на тема – „ЕУ интеграцијата – единствениот наш пат за понатамошен економски развој”, на која говореа Јадранка Аризанковска, Антонета Манов Ставрески и Ирена Мојсовска.
Големите компании се во кондиција за соочување со барањата што ги испорачува европскиот пазар и со конкуренцијата, но сите други кои сакаат да извезуваат треба да обрнат големо внимание на процедурите и стандардите. Во нашиот случај најзасегнати се агро-секторот, металната индустрија и металургијата, кои мора да задоволат голем број еколошки стандарди. Оттаму, нагласи Аризанковска, Стопанската комора ќе побара од Европската комисија да се пролонгирааат роковите во однос на имплементацијата на стандардите кои домашните претпријатија мора да ги имплементираат. Освен тоа, од СКСМ посочија дека има и други барања: за постепено отворање на пазарите и на структурните фондови; зголемување на фондот за конкурентност и иновативност; дополнителни фондови во рамките на ИПА 3; дополнителни вложувања од страна на ЕК во македонската инфраструктура, а сето тоа под надзор на ЕУ за да се избегнат евентуални малверзации; како и за дигитализација на граничните премини во однос на европските.
„Потребно е постепено прилагодување на нашите компании за да може да ги исполнат сите барања, стандарди и процеси до денот на пристапување на земјата во ЕУ. Конкурентноста треба да се подигне во целина, а домашните компании мора да имплементраат нови технологи и стандарди што за нив не е толку едноставен процес. Затоа се овие дополнителни барања. Во процесот на пристапување за секоја земја има рамка со конкретни барања и не се поставува воопшто прашањето дали тие треба или не треба да се исполнат. Едноставно, барањата мора да се имплементираат. Ние ќе бараме пролонгирање на роковите за воведување на одредени стандарди, ќе се обидеме да делуваме на пролонгирање на роковите за имплементација“, посочи Аризанковска, образложувајќи дека роковите ќе се разгледуваат засебно, поради специфичноста на секој од секторите.
Притоа, од Комората нагласуваат дека исполнувањето на условите што ги поставува Унијата, заедно со имплементацијата на регулативата, ќе има финансиски импликации врз компаниите. Со тоа се оправдува барањето за отворање на дополнителните фондови, кои ќе им бидат од огромна корист на претпријатијата. Особено што претстојат големи вложувања во нови технологии, бидејќи во тој поглед нашите компании заостануваат зад европските.
Инаку, од шесте кластери во рамките на преговорите за членство во Европската унија, Стопанската комора директно е склучена во пет.
